ТІЛ ЖАНАШЫРЛАРЫ МӘДЕНИЕТ МИНИСТРІНІҢ АЛҒЫСХАТЫМЕН МАРАПАТТАЛДЫ

Қазақстан Республикасы Мәдениет және спорт министрлігі Тіл саясаты комитеті мен Шайсұлтан Шаяхметов атындағы «Тіл-Қазына» ұлттық ғылыми-практикалық орталығы Қазақстан халқы тілдері күні мерекесіне орай ұлт ұстазы Ахмет Байтұрсынұлына арналған «Тағзым мен тағылым» онлайн отырысын өткізді.

Шарада құттықтау сөз алған Қазақстан Республикасы Мәдениет және спорт вице-министрі Нұрғиса Мұратұлы Дәуешов екі жылдан кейін туғанына 150 жыл толғалы отырған ұлы тұлғаның есімін мәңгі есте қалдыру бағытындағы шаралар жоспарына тоқталып, онлайн отырысқа қатысушыларды мерекемен құттықтады.

Шара модераторы Тіл саясаты комитеті төрағасының орынбасары Әділбек  Қаба осы аралықта Орфографиялық жұмыс тобы он отырысын өткізгенін, бұл өз кезегінде үлкен талқылауларға ұласып отырғанын айтты.

 "Мемлекет басшысының әліпбиді жетілдіруге қатысты тапсырмасын жүзеге асыруда Сіздер орасан зор жұмыс атқардыңыздар, бұл еңбектеріңіз құрметке лайық" деп атап өтті комитет төрағасы орынбасары.

  Сондай-ақ,  Ә. Қаба Ономастикалық комиссияның үш отырысында еліміз бойынша бес жүзге жуық атау өзгертілген, яғни, саясаттың салқыны тиген көптеген көне атаулар қалпына келтіріліп, қазақ тарихы мен мәдениетіне қатысты тұлғалардың есімі берілгенін де атап өтті. "Қазақстан Республикасы Үкіметі жанындағы Республикалық терминологиялық комиссиясының екі отырысы өтіп, әр қайсысында бес жүзден астам термин мақұлданған. Бұл дегеніңіз мыңнан астам жаңа термин қолданысқа еніп, тіліміз соншалықты сөзбен байыды деген сөз. Бұл - осы жұмысты қажырлылықпен атқарған тіл жанашырларының, ономастикалық комиссия мүшелерінің еңбегі" ,- деді ол.

Осындай қажырлы қайраткерлігі мен еселі еңбектері үшін Қазақстан Республикасы Үкіметі жанындағы Республикалық терминологиялық, ономастикалық комиссиясы мүшелері, Қазақ тілі әліпбиін латын графикасына көшіру жөніндегі Ұлттық комиссия жанындағы Орфографиялық, Әдістемелік, Терминологиялық, Техникалық сүйемелдеу жөніндегі жұмыс топтарының мүшелері, облыстық тілдерді оқыту орталықтарының басшылары Қазақстан Республикасы Мәдениет және спорт министрі Ақтоты Райымқұлованың Алғысхатына, Тіл саясаты комитеті төрағасының Құрмет грамотасына ие болды. 

«Ұлт ұстазының тағылымы» тақырыбында баяндама жасаған Ш.Шаяхметов атындағы «Тіл-Қазына» ұлттық ғылыми-практикалық орталығының атқарушы директоры, ғалым Ербол Ердембекұлы Тілешов мәнді баяндама жасады.

«Үш жыл болды, Тілдер мерекесі қазақ ғылымының атасы, ұлт ұстазы Ахмет Байтұрсынұлының туған күніне тұрақтады. Бұл өте маңызды. Тарих аренасына шыққан кез келген халық өз Тәуелсіздігі үшін күреседі. Қазақ тарихы да осындай азаттық арпалысына тұнып тұр. Ресей империясы мен қазақ халқының күші тең емес еді. Жаратқан иеміз сол алмағайып кезеңде халқымыздың көз жасына ұлы Абайды өмірге әкелді. Одан кейін халқына қалқан, жауына семсер болар Алаш азаматтарының шоғыры қазақ көгіне шықты. Солардың ішінде Ахмет Байтұрсыновты ерекше атаймыз».

Бұдан кейін Ахмет Байтұрсынұлы атындағы Тіл білімі институтының директоры Фазылжанова Анар Мұратқызы, Ахмет Байтұрсынұлы музей-үйінің директоры Имаханбет Райхан Сахыбекқызы, Торғайдағы мұражайлар кешенінің басшысы Сәрсекей Гүлбану Құлетқызы Ахмет Байтұрсынұлы туралы ойларын ортаға салып, құттықтау жолдады.

Шараны вице-министр Н.Дәуешев қорытындылады.